01 / ТҰҢҒИЫҚ СЫР
Нептун.
Сенің мінезің Нептунның тұңғиығындай: сырт көзге сабырлы, ал тереңінде қаншама сыр жатқанын бірден аңғару мүмкін емес. Сөзіңнен қиялдың кеңдігін, жанарыңнан нәзік сезімнің ізін көремін. Сені таныған сайын тылсымы таусылмайтын ғажайып әлемнің жаңа бір қырын ашқандай боламын.
ТӨМЕН ЖЫЛЖЫТ НЕМЕСЕ АВТОСАЯХАТТЫ ҚОС
02 / ДАРА БОЛМЫС
Уран.
Уранның көгілдір реңіндей, сенің болмысыңнан да көңілге тыныштық сыйлайтын бір өзгешелік сезіледі. Өз талғамың, өз танымың, ешкімге ұқсамайтын ой өрісің бар. Сол даралығың сені жұрт ішінен бірден танытып, қарапайым қимылыңның өзіне айрықша жарасым береді.
03 / ӘСЕМДІК ПЕН ЖАРАСЫМ
Сатурн.
Сатурнның сақиналары оған қайталанбас көрік дарытса, сенің талғамың мен табиғи кербездігің болмысыңа сондай айрықша сымбат береді. Сөзіңдегі байып, жүрісіңдегі нәзік жарасым, өзіңді ұстауыңдағы еркіндік — бәрі бір-бірін толықтырып тұрады. Сен көзге түсуге ұмтылмай-ақ назарды өзіңе аударасың; сол елеусіз сиқырың көңілден оңай өшпейді.
04 / РУХЫҢНЫҢ БИІГІ
Юпитер.
Юпитердің айбынды келбетінен сенің рухыңдағы беріктікті көремін. Байсалды қалпыңның өзінде сенім ұялататын күш бар; ал сол күштің жанында өзгеге пана болар кеңпейілділік тұрады. Сенің жаныңда әлсіздігімді жасыруға да, өзімді өзгеше көрсетуге де мұқтаж емеспін — бар қалпыммен қабылданатынымды сеземін.
05 / ЖҮРЕГІҢДЕГІ ЖАЛЫН
Марс.
Сенің бойыңда Марстың қызыл шоғындай өшпес жалын бар. Арманыңды қиял күйінде қалдырмай, оған жетуге талпынатын қайсарлығың мені тәнті етеді. Кедергіге мойымайтын жігеріңе қараған сайын, нәзіктік пен батылдықтың бір жүректе осынша жараса алатынына сүйсінемін.
06 / ЖАНЫМА САЯ
Жер.
Сен менің бүкіл әлемімсің. Жер әр өскінге нәр беріп, тіршілікке құшағын ашатыны сияқты, сен де айналаңа жылылық пен мейірім дарытасың. Жаныңда көңілім орнығып, жаным сая табады. Қамқорлығыңның ең қымбат тұсы — оны міндетсінбей, жүрегіңнің табиғи кеңдігімен сыйлайтының.
07 / СҰЛУЛЫҚ ПЕН МАХАББАТ
Шолпан.
Сен менің аспанымдағы ең жарық Шолпан жұлдызымсың. Ажарың көз арбап, нәзіктігің көңіл баурайды; ал жан жылуың сұлулығыңа өзгеше шұғыла дарытады. Күлкіңнің сәулесі түскен сәтте айналам да ажарланып сала береді. Саған қараған сайын сұлулық пен сүйіспеншіліктің бір бейнеге сыйғанын көргендей боламын.
08 / ЗЕРДЕҢНІҢ СӘУЛЕСІ
Меркурий.
Сен Меркурийдей ұшқырсың: ойың сергек, сөзің оралымды, тапқырлығың тосыннан сүйсіндіреді. Әңгімеңде зерде мен әзіл жарасып, қарапайым тақырыптың өзінен қызық таба білесің. Сенімен тілдескенде уақыттың қалай сырғып өткенін аңғармаймын; әр сөзіңнен ойыма сәуле түсіретін бір ұшқын табамын.
09 / КӨҢІЛІМНІҢ АРАЙЫ
Күн.
Сенің күлкің — көңілімнің көкжиегінен көтерілген Күн секілді. Оның жылуы еңсені басқан ойды сейілтіп, қарапайым күннің өзіне арай береді. Мейірлене қараған бір сәтіңнің өзі маған көп сөзден артық әсер етеді. Сен бар жерде дүниенің жарық жағын көбірек байқаймын.
10 / БІР ӨЗІҢ — БІР ҒАЛАМ
Күн жүйесі.
Осы ғаламның әр қиырынан саған ұқсайтын бір сұлулық іздедім: Шолпаннан ажарыңды, Жерден мейіріміңді, Марстан жігеріңді, Нептуннан сыршылдығыңды көрдім. Әрқайсысы сенің бір ғана қырыңды танытқандай. Ал сол қасиеттердің бәрі бойыңда жарасым тауып, мен үшін ешбір теңеу толық жеткізе алмайтын тұтас әлемге айналады.
11 / ЖАНАРЫҢДАҒЫ ҚҰС ЖОЛЫ
Сенің жанарың.
Сенің жанарың — жұлдыздары жымыңдап, сыры тереңге жасырынған осы Құс жолындай. Көзіңе үңілген сайын оның қақ ортасындағы шексіз қара құрдымның нақ өзін көргендей боламын: көзімді де, ойымды да еріксіз өзіне тартады. Сол тұңғиыққа қараған сәтте айналамдағы дүние алыстап, уақыт баяулағандай болады. Ал мен сол үнсіз кеңістіктен сенің айтылмаған сырыңды сезгендеймін.